Apaiz batek, haizea hartzera zihoala, baserritar ezagun bat topatu zuen bidean eta ohi bezala:

«Lanean ari gara?», edo horrelako zerbait esanda,

- Jauna -esan zion baserritarrak-, arestian erbi bat bidali diot etxera.

- Gizona! Mila esker -esanez, bi pezetako dirua eskupean eman zion.

Etxera joan zenean, amari apaizak:

- Gaur afari ederra, e?

- Beti bezalakoa -erantzun zion amak.

Biharamunean, eguerdirako erbia gatzun askan gorde zuelakoan, hamabiak aldean sukaldera eginda, galde hau zuzendu zion:

- Gaur bazkari ona, e? - eta amak:

- Zergatik diozu, Martin? Atzo afari ederra, orain bazkari ona?

(Guraso gutxik hitz egiten dio seme apaizari hika, zuka gehienak.)

- Ez al zuen hala batek erbirik atzo bidali?

- Nora? Gurera? Ezta goraintzirik ere.

Arratsaldean aurre eguneko bidean barrena zihoan apaiza. Aitzurlariarengana berariaz joan zen eta galde hau egin zion:

- Ez zenuen atzo esan erbia bidali zenidala?

- Bai, jauna. Sasi-artetik irten zen eta esan nion: hoa apaizarengana.

Referido por Manuela Ernandorena, ¿en Bera?